Mat 27 | KYG | STEP | Kotilamiyapi'mo mono hu'a ne'apataya vaya'aite'mo yagai'a ne'apataya vaya'e Yu vaya'mogi vayatama vaya'api'e'mo ali'a anupa hu'a mai'ne'apae'mo amagigeno falino, hu'a hapa pai'nae.

Matthew 27

Yutasi'a ane'mumo ae'niya gemae

(Mak 15:1; Luk 23:1-2; Yon 18:28-32)

1 Kotilamiyapi'mo mono hu'a ne'apataya vaya'aite'mo yagai'a ne'apataya vaya'e Yu vaya'mogi vayatama vaya'api'e'mo ali'a anupa hu'a mai'ne'apae'mo amagigeno falino, hu'a hapa pai'nae. 2 Nofiteti'mo ayatalate'mo ki'a atete'a avaleli u'a gamani vekamo yagaino ne'apateya vekamo Pailati ayapi'mo ate'nae. 3 Yutasi'a kutulu ya'mo ali'niya vekamo'mo afi'niyana Yesufe'mo, faligiye, hu'a hu'nageno afiteno'ae'mo aipamo alino afe leteno teti'a siluva alaga monimo mono hu'a ne'apataya vaya'aite'mo yagai'a ne'apataya vaya'aitega'e vayatama vaya'aitega'e'mo alininuno'ae'mo, 4 alagepa vekamo kutulu ya'mo ali'nova'mofe'mo hosu kava'mo hu'nove, huno hapa pai'nige'apae'mo, lagae ya'mo ohane'nifa kagaika ya'mo hane'niye, hu'a ha pai'nae. 5 Ha pai'nageno'ae'mo ataleno uno alopa mono nopi'mo teti'a siluva alaga monimo yaga auno aino atagu faeno ataleteno ataleno uno ane'mumo ae'niye. 6 Mono hu'a ne'apataya vaya'aite'mo yagai'a ne'apataya vaya'mogimo u'a ani alaga monimo alite'apae'mo, ani monimo kola monimo hane'niya'mofe'mo alita ofalini monifi'mo malesunana ke'aepa gemo amagita atalegaune, hu'a hu'nae. 7 Hu'a hute'a alini u'a mago mopaleti'mo samomo alo nehiya vekamo mopamo alu kote vaya'mo e'a mai'ne'a falisaya vaya'mo alini u'a ki'a apatesaya mopamo miya fai'nae. 8 Ani kava hu'naya'mofe'mo ani mopamo agi'amo Kolakayagae hu'a agi aeme aeme e'a hemeni'e'mo ani agi ne'ae. 9 Ani kava'mo hu'nageno'ae'mo Gotitegati gemo alinineno aeno hakalo huno hapa nepaiya vekamo agi'amo Yelemaiya'a hu'niya gemo afole ai'niye. Yelemaiya'a huno'ae'mo,Apakaemo teti'a siluva alaga monimo Isaleli vaya'mogi apakesa afi'a hu male'naya monimo ani vekamo miya faisaya monimo ali'nae. 10 Alite'a u'a Ala kava ne'mo'a huvo huno naha pai'niya gemo akame hu'a mopaleti'mo samomo alo nehiya vekamo mopamo miya fai'nae, huno avo'mo kae male'niye.

Yesu'a Pailati aulagale'mo he tino mai'niya gemae

(Mak 15:2-5; Luk 23:3-5; Yon 18:33-38)

11 Yesu'a yagaino ne'apateya gamani vekamo aulagale'mo he tino mai'nigeno'ae'mo, Yu vaya'ai kini ne'apimo mai'napiye, huno afi ge'nigeno'ae'mo, he ani gemo ago alagi nehane, huno ha pai'niye. 12 Mono hu'a ne'apataya vaya'aite'mo yagai'a ne'apataya vaya'e vayatama vaya'mogi'e'mo hu'apae'mo, ani hosu kava'mo hu'niye ina hosu kava'mo hu'niye, hu'a hu'nageno'ae'mo ge osuno afa'a mai'niye. 13 Pailati'a huno'ae'mo, muki kavafe'mo kagaefe'mo nehaya gemo o'afi'napiye, huno afi ge'niya'monanafa 14 ge'ale'mo aeno atagaina huno ha opai'niya'mofe'mo gamani vekamo'a lusi kava huno hau ai'niye.

15 Yagaino ne'apateya gamani vekamo'a Yu vaya'ai hopa Pasova afina'mo kalavusifi'mo mai'naya vayapati'mo lekana pai'naya vayake'mo muki kafuga'ae kafuga'ae'mo magoke magoke vaya'mo hatu maeno apatege'a ute ute hu'a u'nae. 16 Ani afina'mo mago vekamo kalavusifi'mo mai'niya vekamo agi'amo Malamasi'ae. Vaya'mogimo ani vekamo age'nayana hosu vekamo mai'niye, hu'a age'nae. 17 Muki vaya'mo e'a ali'a anupa hu'a mai'nageno Pailati'a ge huno apafi ge'niye, haiya vekamo atesugeno lapakaetegamo afa'a ugiye. Malamasi'a atesufi Kalaisi'ae hutapa agi ne'aya vekamo Yesu'mo atesuve, huno apafi ge'niye. 18 Apaipa kafamo hae'nageno'ae'mo avaleli e'a nayapi'mo ate'nae, huno ago age'niya'mofe'mo ani ge huno apafi ge'niye.

19 Pailati'a haino agoti huno ne'apateya siate'mo fai mai'nigeno'ae'mo a'amo'mo mago gemo huno atalegeno agaetegamo e'niye. Ani gemo'a huno'ae'mo, hemeni hani'ilagamo alagamuna agete'nae'mo ani vekae'mo naipamo'mo lusi kava huno kana hu'niya'mofe'mo ani alagepa vekalegamo mago kava'mo osuka afa'a ato, huno ha pai'niye.

20 Mono hu'a ne'apataya vaya'aite'mo yagai'a ne'apataya vaya'e vayatama vaya'mogi'e'mo muki vaya'aife'mo hapa pai'apae'mo, Malamasi'a ateteka Yesu'mo amagiyo, hutapa hiyo, hu'a apakesamo ali'a hapa pai'nae. 21 Yagaino ne'apateya gamani vekamo'a, lole vekalapati'mo ina la'mo atesugeno lapakaetegamo ugiye, huno apafi ge'nige'apae'mo, Malamasi'a ato, hu'a ha pai'nageno'ae'mo, 22 Atesuvana Kalaisi'ae, hutapa agi ne'aya vekamo Yesutegamo na kava hisuve, huno apafi ge'nige'apae'mo, malipu yosale'mo nili aiyo, hu'a ha pai'nae. 23 Gamani vekamo'a, Na kava hu'nigetapaene. Haiya hosu kava hu'niye, huno apafi ge'nige'apae'mo mago'e mago'e hu'a alopa gefati'mo hu'apae'mo, malipu yosale'mo nili aiyo, nili aiyo, hu'a ha pai'nae. 24 Pailati'a apaketeno'ae'mo lusi kava hu'a apano aete'a ge'nile'mo ago hu'a ae'a ati kae'naya'mofe'mo afa'a ae'na apaka osegauve, huno huteno muki vaya'ai apaulagale'mo ani'mo alino aya'mo sese huteno'ae'mo, mani alagepa vekamo falisiya vai'mo nagae ya'mo ohane'nifa lapakaitapi ya'mo hane'niye, huno hapa pai'nige'apae'mo 25 muki vaya'mogimo, falisiya vai'mo afa'a alisunage'a mafa'netimogi'e'mo afa'a aligae, hu'a ha pai'nae. 26 Hu'a ha pai'nageno Malamasi'a ategeno apakaetegamo ne'vigeno'ae'mo ati vaya'aife'mo, nofi kayoteti'mo amagiyo, huno huteno malipu yosale'mo nili aite'a ali'a he ti'a atesayafe'mo avalelino uno apami'niye.

Ati vaya'mogimo Yesufe'mo kigi yokalo gemo hu'a ate'naya gemae

(Mak 15:16-20; Yon 19:2-3)

27 Pailati ati vaya'amogimo avaleli u'a gamani vaya'ai nopi'mo hai'a ate'ne'apae'mo muki ati vaya'aife'mo ge hage'a e'a ali'a anupa hu'a mai'nae. 28 Apakaemo kukena'amo asagi'a male'ne'apae'mo haesa yatala kukenamo ali'a vai'a ate'nae. 29 Vai'a atege aufe nofiteti'mo ali'a kalagifa kakolitamo alo hute'a agenopale'mo male'a atege kanipa kayo'mo ali'a lamaga ayapi'mo amige hute'a aulagale'mo apale'ya fai'ne'apae'mo, Yu vaya'ai ala kini veka'apimogae, hu'a, haiya kava hane, hu'a hute'a kigi yokalo gemo hu'a ate'nae. 30 Apavenatu'na he'a atege ayapati'mo kanipa kayo'mo hafale'a agenopale'mo amagige hu'a mai'nae. 31 Kigi yokalo gemo hu'a ate'a hano hute'apae'mo yatala kukenamo ali'a asagi'a atalete'a agai'a kukena'amo ali'a vai'a atete'a malipu yosale'mo nili aite'a ali'a he ti'a atesayafe'mo avaleli'a u'nae.

Yesu'mo nili aite'a ali'a he ti'a ate'naya gemae

(Mak 15:21-32; Luk 23:26-43; Yon 19:17-27)

32 Apakaemo taonifati'mo atale'a malaga avaleli'a u'nageno'ae'mo mago vekamo agi'amo Saimoni'a Salini kotega vekamo ne'ege'a fotu hute'a malipu yosamo ali'a kofi'a ate'nageno kofilino u'niye. 33 Gogatagayagae agimo aepa'amo anu'ayamufagayagamo u'a ava'yi hu'nae. 34 Apakaemo nofi alagafati anipi'mo atu ofa malasinimo ali'a lakite'a ami'nageno neno afigeno'ae'mo mago'e huno o'ne'niye. 35 Malipu yosale'mo nili aite'a ali'a he ti'a ate'ne'apae'mo kukena'amo ali'a fako hu'a alite'a mago yafateti'mo yokalo le'nae. Gotitegati gemo alinineno aeno hakalo huno hapa nepaiya vekamo'a huno'ae'mo,

Kukena'nimo ali'a fako hu'a alite'a yatala kukena'nile'mo yokalo lete'a aeno apaka se'niya vekamo'a ali'niye,
huno hu'niya gemo afole aisiyafe'mo ani kava'mo hu'nae. 36 Alite'apae'mo itopale'mo mai'ne'a yagai'a mai'nae. 37 Apakaemo mago avo'mo kae male'niya gemo ali'a agenopalegamo atulu yosale'mo nili ai male'nae. Ani gemo'a ina hosu kava'mo hu'niye, hu'a hute'a agoti hu'a ate'naya gemo'a huno'ae'mo,

Mani vekamo Yesu'ae. Yu vaya'ai ala'apimo kini nene,

huno avo'mo kaeteno nili ai male'niye. 38 Lole vekala'moganimo vaya'mo apamagite'ana kumaya'mo ne'ali'a vekala'mo agae'e'mo nili aite'a ali'a he ti'a anate'nae. Mago vekamo ali'a lamaga haopale'mo he ti'a atete'a mago vekamo ali'a hoga haopale'mo he ti'a ate'nae. 39 Kate'mo u e'a hu'naya vaya'mogimo keka hute'apae'mo, 40 alopa mono no'mo he'na halagape vaite'na lole'e mago'e afina'mo halate ki'na hano huguve, huka hu'nana vekamogi kagaika kagufamo alika katika kato. Goti mafa'ne'amo mai'nisanana aika akaika emikeno, hu'a hute'a hu'a faipa hu'a ate'nae. 41 Mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi vayatama vayanagi hu'a ani ge hu'nae, 42 alu vaya'mo hapa mae'niyanageno agai'amo afa'a ha o'maegaiye. Isaleli vaya'mogitale'mo yagaino nelateya kini vekamo mai'nisiyana malipu yosaleti'mo aino akaino eminesigetae'mo ge'amo afa'a afigune. 43 Goti'a ha maesiyafe'mo agesamo afino mai'niye. Agaemo huno'ae'mo, Goti mafa'ne'amo mai'nove, huno hu'niya'mofe'mo Goti'a agufamo alino katino atesifigeta agegaune, hu'a hute'a hu'a faipa hu'a ate'nae. 44 Ani ge hu'ana vaya'mo apamagite'ana kumaya'mo ne'ali'a vekala'mogani'e'mo hu'ana faipa hu'ana ate'na'ae.

Yesu'a fali'niya kavafe'mo ava gemo hu'niya gemae

(Mak 15:33-41; Luk 23:44-49; Yon 19:28-30)

45 Felugakuku'mo muki haopalegamo hani huteno lole'e mago'e aovamo utegeno halate une'mo yegemo le'niye. 46 Une agufa afina'mo Yesu'a, Ilai, Ilai, lama samakatani, huno alopa gefati'mo keya aeno ge hu'niye. Ani ge hu'niya gemo aepa'amo hane'niyanaGoti'nimo, Goti'nimo, huno, na kava higeka nataleka u'nane, huno hu'niye. 47 Mago he ti'a mai'naya vaya'mogimo ani gemo afite'apae'mo, Ilaiyafe'mo keya aeno ge nehiye, hu'a hu'nae. 48 Apakaepati'mo mago vekamo'a ani gemo afiteno'ae'mo nagu nagu huno uno kaki'nofagana ya'mo alino nofi alagafati anipi'mo aeteno yatala kanipa kayote'mo faino lanu paiteno ami'niye. 49 Ami'niya'monanafa alu vaya'mogi ha pai'apae'mo, afa ato. Ilaiya'a emineno ha maesifigeta agava mai'neta agegaune, hu'a ha pai'nae. 50 Yesu'a halate alopa gefati'mo keya aeno ge huteno'ae'mo auneme'amo ataleno fali'niye.

51 Fali'nigeno'ae'mo alopa mono nopi'mo alapa'age lavolavoleti'mo ae'a akani male'naya lavolavomo anagati aeno apake ailino emineno afelaga atale'niye. Lusi imima ali'nigeno alopa yafa avemo aino apalo ati'niye. 52 Yafa kapi'mo ki'a apate'naya vaya'mo yafa ka'mo aino apalo ati'nigeno Goti'a apaote vaya'mo asole vaya'mo alino he tino apate'niye. 53 Goti'a Yesu'mo alino he tino ate'nige'apae'mo yafa kapati'mo he ti'a aote alopa taonifi'mo u'a mai'nage'a asole vaya'mogi apake'nae.

54 Ati vaya'aite'mo yagaino ne'apateya veka'e ati vaya'a'e'mo Yesute'mo yagai'a mai'ne'a agayana imima ali'nigeno muki kava'mo afole ai'nige'a agete'apae'mo lusi kava hu'a koli hute'apae'mo, alagi lama gemo hune, ani vekamo Goti mafa'ne'amo mai'niye, hu'a hu'nae.

55 Asole a'ne anaga'mo e'a aise afagi'ale'mo he ti'a mai'ne'a aulu he'a age'a mai'nae. Apakaemo Galeliya kotegati'mo Yesu'mo yagai'a atesayafe'mo akame hu'a e'nae. 56 Ani a'ne anagapi'mo Maliya'a Maganala kotega anagi Maliya'a Yemisi'e Yosefe'e'mo ita'animo'agi Sepeti mafa'nela'mogani ita'animo'agi hu'a mai'nae.

Yesu'mo yafa kapi'mo kino ate'niya kavafe'mo ava gemo hu'niya gemae

(Mak 15:42-47; Luk 23:50-55; Yon 19:38-42)

57 Yegemo lamino fale'nigeno'ae'mo mago kagemi ya'e vekamo Alamatiya taonifi vekamo agi'amo Yosefe'a Yesu ge'amo ne'afiya vekamo e'niye. 58 Pailatitegamo uno, Yesu kefa'amo alininu'na ki'na ategesuve, huno afi ge'nigeno Pailati'a, alinitetapa amiyo, huno hapa pai'niye. 59 Yosefe'a aliteno'ae'mo saufa lavolavomo yaveyave lavolavofi'mo hayaeteno 60 agai'amo saufamo kafi male'niya yafa kapi'mo alinino haino male'niye. Maleteno alopa yafakefamo alino heleve heleve hulinuno ani yafa ka avayale'mo aino akani male'niye. 61 Maganala kotega Maliya'e hamo'amo Maliya'e'mo yafa ka haopale'mo itopale mai'na'ae.

Ati vaya'mogi yafa kate'mo yagai'a mai'naya gemae

62 Ani hani'ilagamo utesige'a alo nehaya afina'mo mono hu'a ne'apataya vaya'aite'mo yagai'a ne'apataya vaya'e Falasi vaya'e'mo Pailatitegamo u'a, 63 Ala vekae, hu'a, ani humi'nami gemo nehiya vekamo'mo afa'a mai'neno'ae'mo, lole'e mago'e afina'mo utesige'na halate he tiguve, huno hu'niya gee'mo lagesa afuna'mofe'mo 64 kanolule'mo yagaitapa maime maime ne'vigeno'ao lole'e mago'e afina'mo hano hino, huka hapa paiyo. Fiku yanage'a ge'amo ne'afiya vaya'mogi e'a kefa'amo kumaya alini'a ute'apae'mo muki vaya'aife'mo ago he tino u'niye, hu'a hapa paigae. Mani henaga hisaya aigofe gemo'a hogoteno hu'niya aigofe gemo ago aeno aga seno asole vaya'mo humi apategaiye, hu'a ha pai'nae. 65 Pailati'a, ati vayatapimo mai'nayanagi apavalelitutapa yagaita apateyo. Age'naya kava'mo hutapa alu kava alu kava'mo hutapa yagaitapa maiyo, huno hapa pai'nige'a 66 atale u'a aino akani male'niya yafate'mo kameleti'mo ae'a kamae malete'a ati vaya'aife'mo, alagepa hutapa yagaitapa maiyo, hu'a hapa pai'nage'a u'nae.